John Bolton, ish-këshilltari për Sigurinë Kombëtare i presidentit Donald Trump, u përgjigj në emisionin “Off the Record” të moderuar nga Andrea Danglli për politikën e Shteteve të Bashkuara lidhur me shpalljen e personave non grata.
Ai theksoi se këto vendime merren mbi baza faktike dhe gjeopolitike, pa u ndikuar nga lobimet apo debatet politike të brendshme në vendet e prekura. Sipas Boltonit, edhe pse shpalljet mund të kenë pasoja politike lokale, motivimi kryesor mbetet siguria kombëtare amerikane.
Në lidhje me marrëdhëniet Kosovë–Serbi, Bolton sqaroi se administrata e parë Trump mbështeste idenë që palët të arrinin vetë një zgjidhje të përhershme, pa imponim nga jashtë. Ai deklaroi se SHBA nuk ishte kundër përshtatjes së territoreve, për sa kohë që kishte dakordësi mes dy vendeve dhe gjithçka respektonte kuadrin ligjor. Zgjidhja përfundimtare është thelbësore për të shmangur ndërhyrjen e aktorëve të jashtëm që synojnë destabilizimin e Ballkanit.
Bolton vlerësoi se rreziku i paqëndrueshmërisë në Ballkan mbetet real, sidomos në kontekstin e luftës në Ukrainë dhe ambicieve të Rusisë. Stabiliteti i rajonit është në interes të SHBA-ve, ndërsa NATO mbetet shtylla kryesore e sigurisë, pavarësisht sfidave në marrëdhëniet transatlantike.
Përditësime
John Bolton deklaroi se vendimet për shpalljen e personave non grata duhet të jenë gjeopolitike, jo të motivuara nga debatet politike të brendshme.
"Në fakt duhet të ishte një vendim gjeopolitik, nuk mund ta përdorim atë për t’u futur brenda debatit të brendshëm politik... Vendimet mund të kenë ndikime politike në vendet e prekura dhe kjo nuk duhet të jetë motivi ynë...", tha ai.