Juristi Jordan Daci ka mohuar çdo lidhje me procesin zgjedhor që po zhvillohet në Kuvendin Kombëtar të Partisë Demokratike, pasi emri i tij është shfaqur në fletën e votimit si kandidat për anëtar të Këshillit Kombëtar. Në një deklaratë publike, ai sqaroi se nuk ka dhënë asnjë pëlqim dhe nuk ka pasur dijeni paraprake për këtë propozim.
Daci theksoi se nuk është anëtar i Partisë Demokratike dhe se përfshirja e tij në listë nuk përfaqëson vullnetin e tij personal apo profesional. Ai kërkoi që emri i tij të mos interpretohet si shenjë e angazhimit politik ose mbështetjes për ndonjë krah politik.
Aktualisht, Jordan Daci është në proces kandidimi për postin e gjyqtarit në Gjykatën Kushtetuese të Republikës së Shqipërisë. Në reagimin e tij, ai nënvizoi se ky funksion kërkon respektimin rigoroz të parimeve të paanësisë dhe pavarësisë, duke u shprehur se përfshirja në listat partiake bie në kundërshtim me statusin e tij aktual profesional. Ai përsëriti kërkesën që emri i tij të hiqet nga lista dhe të mos i nënshtrohet votimit në Kuvendin e partisë.
Përditësime
Përfaqësuesi i Partisë Demokratike, Ivi Kaso, deklaroi se përfshirja e emrit të Jordan Dacit në listën për Këshillin Kombëtar erdhi si pasojë e një ngatërrese identiteti. Kaso sqaroi se në listë figuron një tjetër person me të njëjtin emër dhe mbiemër, dhe jo avokati i njohur.
Zyra e Komunikimit e Partisë Demokratike, përmes drejtuesit Alfred Lela, sqaroi se kandidati për Këshillin Kombëtar është një aktivist me banim në Sarandë. Në përgjigje ndaj avokatit Jordan Daci, Lela saktësoi se kandidatura nuk mund të bllokohej për shkak të përputhjes së emrit, duke theksuar se procesi i selektimit ka respektuar kriteret statutore.