Sulmuesi argjentinas Julian Alvarez ka rifilluar kontaktet me Atletico Madridin dhe ka nisur zbatimin e programit të personalizuar të stërvitjes, të hartuar nga stafi teknik i klubit për lojtarët që kanë qenë të angazhuar me ekipet kombëtare. Sipas raportimeve, Alvarez ndodhet aktualisht me pushime në Ibiza, por që prej datës 1 gusht po ndjek udhëzimet e klubit dhe pritet t'i bashkohet pjesës tjetër të skuadrës në stërvitje më 10 gusht.
Ky zhvillim vjen në një kohë kur lojtari ka bërë të ditur dëshirën për t'u larguar nga Atletico Madrid për t'iu bashkuar Barcelonës. Megjithatë, qëndrimi i klubit madrilen mbetet i prerë, duke refuzuar çdo mundësi negociatash me rivalët e tyre në La Liga. Drejtuesit e klubit e konsiderojnë Alvarezin element të rëndësishëm të projektit sportiv të trajnerit Diego Simeone dhe presin nga ai sjellje profesionale, të cilën po e tregon duke iu përmbajtur programit stërvitor.
Edhe pse e ardhmja e argjentinasit mbetet objekt spekulimesh, nuk përjashtohet mundësia që një ofertë e konsiderueshme nga jashtë Spanjës të ndryshojë situatën deri në mbylljen e afatit kalimtar. Alvarez, i cili u transferua te madrilenët nga Manchester City, pritet të ketë rol qendror në planet për sezonin e ri nëse vendos të qëndrojë.
Në anën tjetër, burime mediatike raportojnë për një lëvizje të mundshme të Atletico Madridit drejt Barcelonës. Klubi madrilen po tregon interes për të siguruar shërbimet e sulmuesit Ferran Torres. Synimi për të marrë Torresin mbështetet në marrëdhëniet e mira që lojtari ka me Mateu Alemany, i cili kishte udhëhequr transferimin e tij te Barcelona në vitin 2022. Megjithatë, klubi ka sqaruar se ky interesim nuk lidhet me ndonjë shkëmbim të mundshëm për Julian Alvarez, pasi argjentinasi vlerësohet si i pashitshëm brenda kampionatit spanjoll.
Përditësime
Julian Alvarez ka nisur zyrtarisht përgatitjet me Atletico Madrid, duke shënuar një zbutje të tensioneve mes palëve. Drejtuesit e klubit dhe lojtari kanë vendosur të ndjekin një qasje më konstruktive përmes dialogut, pavarësisht zërave të vazhdueshëm për një interesim të mundshëm nga FC Barcelona.
Barcelona ka paraqitur një ofertë zyrtare prej 115 milionë dollarësh për Julian Alvarez. Sipas The Athletic, fati i kësaj lëvizjeje do të qartësohet pas rikthimit të sulmuesit argjentinas në Madrid më 10 gusht. Për të përforcuar repartin e sulmit dhe për të mbuluar largimet e mundshme të Robert Lewandowski apo Ferran Torres, klubi po shqyrton edhe profilet e Anthony Gordon dhe Karim Adeyemi. Ndërkohë, PSG ka shfaqur interes konkret për Torres, kontrata e të cilit me katalanasit është në vitin e fundit.
Drejtori sportiv i Barcelonës, Deco, i shoqëruar nga Joao Amaral, ka udhëtuar drejt Madridit për të zhvilluar negociata rreth transferimit të Julian Alvarez. Zyrtari katalanas pritet të takohet me agjentin e sulmuesit argjentinas, Fernando Hidalgo, për të diskutuar kushtet e një marrëveshjeje të mundshme.