Eliminimi i Gjermanisë nga Kupa e Botës 2026 në fazën e 1/16-ës, pas humbjes 4-3 me penallti ndaj Paraguait (1-1 në kohën e rregullt), ka shkaktuar reagime të shumta. Ky dështim shënon herën e tretë radhazi që përfaqësuesja nuk arrin të kalojë fazën e parë me eliminim direkt në një turne madhor.
Pas ndeshjes, emri i Jurgen Klopp, aktualisht drejtues global i futbollit te Red Bull, është lakuar gjerësisht si pasuesi ideal i Julian Nagelsmann. I pyetur për këtë mundësi, Klopp nuk e ka përjashtuar veten në të ardhmen, por ka zgjedhur të mos japë një përgjigje konkrete.
“E kuptoj që emri im përmendet sa herë flitet për trajnerin e kombëtares, por nuk është momenti për të diskutuar. Kam një punë që më pëlqen shumë dhe, për aq sa di unë, nuk është një punë me kohë të pjesshme,” deklaroi Klopp.
Nga ana tjetër, Julian Nagelsmann ka deklaruar se nuk ka ndërmend të japë dorëheqjen dhe është i gatshëm të vazhdojë projektin e tij nëse Federata Gjermane e Futbollit (DFB) dëshiron që ai të vijojë. Mbështetje për trajnerin ka shprehur edhe drejtori sportiv, Rudi Völler, i cili e ka cilësuar atë si një trajner të nivelit të lartë, ndonëse ka theksuar se vendimi përfundimtar do të pasojë një analizë të thelluar të situatës nga ana e drejtuesve të institucionit.