Në Los Anxhelos, një juri ka shpallur fajtorë për neglizhencë kompanitë Meta dhe YouTube në një çështje gjyqësore për varësinë nga rrjetet sociale.
Padinë e ngriti një e re, e cila argumentoi se platformat ishin projektuar për të krijuar varësi dhe se kjo kishte ndikuar negativisht në shëndetin e saj mendor. Juria vendosi se kompanitë kishin rol të rëndësishëm në dëmin e shkaktuar, duke urdhëruar pagesën e 3 milionë dollarëve dëmshpërblim. Pjesa më e madhe i takon Meta-s, ndërsa dëmshpërblime shtesë ndëshkuese mund të vendosen më vonë.
Prince Harry dhe Meghan Markle kanë reaguar duke e quajtur vendimin "një pikë kthese për familjet". Ata kanë theksuar se platformat kanë funksionuar për vite pa marrë parasysh ndikimin te fëmijët dhe të rinjtë. Çifti ka deklaruar se ky vendim përfaqëson një "përballje me realitetin" dhe një hap drejt përgjegjësisë së kompanive të mëdha teknologjike.
Meta dhe Google, zotërues i YouTube-s, kanë kundërshtuar vendimin. Ata kanë deklaruar se do të shqyrtojnë hapa të mëtejshëm ligjorë dhe se shëndeti mendor i të rinjve është një çështje komplekse që nuk mund t’i atribuohet një platforme të vetme.
Prince Harry dhe Meghan Markle prej kohësh ngrenë shqetësime për ndikimin e rrjeteve sociale te të rinjtë përmes fondacionit të tyre, duke kërkuar më shumë siguri dhe mbrojtje për fëmijët në hapësirën digjitale.