Shaip Kamberi, deputet shqiptar në Parlamentin e Serbisë, bashkë me Ahmedin Shkrijel dhe Minela Kalender nga SDA Sandzak, kanë propozuar një rezolutë për dënimin e krimeve të kryera në Kosovë gjatë viteve 1998-1999 nga strukturat ushtarake, policore dhe paramilitare të regjimit të atëhershëm të Serbisë.
Rezoluta dënon krimet sistematike, vrasjet, deportimet, spastrimin etnik dhe dhunën ndaj popullsisë civile shqiptare. Ajo rikujton masakrat në Reçak, Mejë, Krushë të Madhe, Krushë të Vogël, Suharekë, Izbicë, Podujevë dhe vende të tjera, si dhe varrezat masive në Batajnicë, Petrovo Selo, Perućac dhe Kiževak.
Dokumenti kërkon hapjen e arkivave shtetërore dhe ushtarake, vazhdimin e hetimeve për personat e zhdukur, si dhe garantimin e së drejtës për të vërtetën dhe drejtësinë për familjet e viktimave. Rezoluta dënon gjithashtu mohimin e krimeve të luftës dhe glorifikimin e kriminelëve të dënuar.
Sipas Kamberit, kjo rezolutë është thirrje për ballafaqim me të kaluarën dhe pranimin e fakteve të vërtetuara nga Tribunali Ndërkombëtar Penal për ish-Jugosllavinë. Ai thekson se pranimi i së vërtetës dhe respektimi i viktimave nuk dënon qytetarët e Serbisë, por distancon nga politikat përgjegjëse për krimet. Vetëm përmes pranimit të fakteve, drejtësisë dhe përgjegjësisë ndërtohet paqja e qëndrueshme dhe besimi ndërmjet popujve në rajon.