Deputeti shqiptar në Kuvendin e Serbisë, Shaip Kamberi, ka reaguar për zhvillimin e stërvitjeve ushtarake nga Serbia në territorin e Komunës së Bujanocit, pranë kufirit me Republikën e Kosovës.
Ai i ka cilësuar këto aktivitete shqetësuese për sigurinë në rajon, duke theksuar se zhvillimi i tyre afër zonave të banuara dhe përfshirja e kapaciteteve ajrore ndikojnë në perceptimin e sigurisë tek komunitetet lokale, në veçanti te shqiptarët në Luginën e Preshevës.
Sipas Kamberit, këto zhvillime mund të rrisin tensionet dhe të ulin besimin ndërmjet aktorëve lokalë, duke e bërë më të ndjeshme situatën në Ballkanin Perëndimor.
Kamberi vlerëson se për ruajtjen e stabilitetit afatgjatë është thelbësore që palët të veprojnë me përmbajtje dhe në përputhje me parimet e sigurisë bashkëpunuese. Roli i bashkësisë ndërkombëtare është kyç për të nxitur dialogun konstruktiv, transparencën dhe shmangien e veprimeve provokuese, si dhe për respektimin e normave ndërkombëtare dhe forcimin e mekanizmave për parandalimin e krizave.
Ai ka kërkuar shtimin e pranisë së KFOR-it, duke e cilësuar atë si të rëndësisë primare për sigurinë në rajon.
Në fund, Kamberi ka kritikuar qasjen e presidentit serb Aleksandar Vučić ndaj Kosovës dhe shqiptarëve në Luginë, duke kërkuar nga NATO rishqyrtimin e vendimit për Zonën Tokësore të Sigurisë.
Përditësime
Kryeministri i Kosovës Albin Kurti i cilësoi stërvitjet ushtarake serbe në Bujanoc si tepër shqetësuese dhe mjet presioni nga Serbia për të mbajtur tensionin pranë kufirit. Ai kërkoi reagim ndërkombëtar.