Presidenti serb Aleksandar Vuçiq ka reaguar ndaj një deklarate bashkëpunimi në fushën e mbrojtjes dhe sigurisë, të nënshkruar më shumë se një vit më parë mes Prishtinës, Tiranës dhe Zagrebit.
Nënshkruesit e paraqitën atë si angazhim për forcimin e bashkëpunimit, mbrojtjen e territoreve dhe kontributin në paqe e siguri ndërkombëtare, duke theksuar se nuk synon askënd.
Serbia e interpretoi si provokim që rrezikon integritetin territorial dhe sigurinë e qytetarëve. Muajin e kaluar, Vuçiq deklaroi për Radio-Televizionin e Serbisë se "në mes të asgjësë shfaqet një aleancë ushtarake mes Prishtinës, Tiranës dhe Zagrebit. Jo një bashkëpunim ushtarak-teknik, jo një bashkëpunim ushtarak-ekonomik, por një aleancë ushtarake. Dhe, natyrisht, jam i frikësuar për çdo qytetar të këtij vendi".
Javën e kaluar, ai paralajmëroi investime të reja në ushtri dhe rritje të kapaciteteve mbrojtëse për shkak të një situate komplekse sigurie, të krijuar nga aktivitetet e këtyre vendeve. Në një postim në Facebook, Vuçiq shkroi se "në ditët në vijim, do të nënshkruajmë kontrata shumë të rëndësishme për prokurimin e armëve dhe pajisjeve ushtarake. Presim vizita të rëndësishme dhe kontrata të reja me vende të tjera, me qëllim bërjen e porosive të mëdha për ushtrinë tonë".
Bashkëpunimi ushtarak mes shteteve është normë në arkitekturën e sigurisë moderne, por në Ballkan perceptohet si problem kur përfshin Kosovën dhe aleatet e NATO-s, Shqipërinë dhe Kroacinë. Kujtesa e konflikteve të viteve ’90 ndikon ende në interpretimin e zhvillimeve të tilla.