Kanadaja ka nisur një program shumë miliardësh për forcimin e ushtrisë së saj, duke u mbështetur më shumë te kompanitë kombëtare për të ulur varësinë nga Shtetet e Bashkuara në fushën e mbrojtjes.
Gjatë një vizite në zyrat e kompanisë CAE Inc., e specializuar në teknologjitë e simulimit për mbrojtje dhe aviacion, kryeministri Mark Carney deklaroi se vendi ka mbështetur tepër te gjeografia dhe faktorë të jashtëm për sigurinë e tij. "Kjo ka krijuar cenueshmëri që nuk mund t’i lejojmë më dhe varësi që nuk janë më të qëndrueshme", shtoi ai.
Strategjia e re parashikon investime prej 82 miliardë dollarësh gjatë pesë viteve të ardhshme, për të arritur objektivat e NATO-s: 2% të Prodhimit të Brendshëm Bruto në shpenzime mbrojtjeje deri në fund të këtij viti dhe 5% deri në vitin 2035. Plani përfshin forcimin e kapaciteteve në tokë, det dhe ajër.
Carney ka paralajmëruar prej muajsh se bota po bëhet më e rrezikshme dhe se SHBA-të nuk janë më një partner i besueshëm për mbrojtjen e Kanadasë. Ai shprehu shqetësim për sovranitetin në Arktik, ku shkrirja e akujve për shkak të ndryshimeve klimatike po rrit interesin e fuqive të mëdha për minerale kritike.
Kryeministri kanadez ka kritikuar administratën e presidentit amerikan Donald Trump. Në një fjalim në Davos gjatë World Economic Forum në janar, ai deklaroi se rendi global i dekadave të fundit është "copëtuar". Ai theksoi se nacionalizmi kanadez synon mbrojtjen e të drejtave të qytetarëve dhe garantimin e sigurisë në një botë të paqëndrueshme.