Kancelari gjerman Friedrich Merz do të takojë Presidentin e SHBA-së Donald Trump të hënën, më 2 mars 2026, në kryeqytetin amerikan. Ai planifikon të qëndrojë atje deri të mërkurën. Takimi u parashikua para zhvillimeve të fundit në Lindjen e Mesme.
Sulmet ndaj Iranit dhe kundërsulmet e tij hakmarrëse ka të ngjarë të jenë temat kryesore. Gjermania nuk është e përfshirë në këto sulme. Para udhëtimit, Merz mbrojti veprimet ushtarake të SHBA-së dhe Izraelit. Qeveria gjermane ndan "lehtësimin e shumë iranianëve që regjimit të mullahëve tani po i vjen fundi", tha ai. Në të njëjtën kohë, ai kërkoi një zgjidhje të qëndrueshme të konfliktit dhe paralajmëroi për rrezikun e përshkallëzimit të luftës.
Udhëtimet e fundit të Merz-it
Friedrich Merz, kryetar i partisë konservatore CDU, u rizgjodh në këtë post më 22 shkurt 2026, në kongresin e partisë në Stuttgart. Javët e fundit ai ka përmirësuar imazhin si politikan i politikës së jashtme. Pas Kinës, ku kaloi pothuajse një javë për të përmirësuar marrëdhëniet me autoritetet në Pekin, tani drejtohet te SHBA. Kjo vizitë ndiqet me kujdes në Uashington.
Qëllimi i Merz-it është të flasë me Trump në një bazë më të barabartë se më parë.
Komenti për tarifat
Trump pësoi një humbje kur Gjykata Supreme e SHBA-së rrëzoi politikën e tij të ashpër tarifore, duke përfshirë masat kundër Gjermanisë dhe Bashkimit Evropian. Merz komentoi vendimin për transmetuesin publik ARD, pas kongresit të CDU-së: "Është një vendim interesant, të cilin shumë e prisnin - që Gjykata Supreme në Uashington të vendosë kufizime për qeverinë."