Natasha Kandiq, drejtoreshë e Fondit për të Drejtën Humanitare, në një komunikatë për media ka kërkuar largimin e ekspozitës së Shkëlzen Gashit nga hapësira publike.
Ajo thekson se ekspozita përmban shumë pasaktësi rreth masakrave të ndodhura në Kosovë. Sipas saj, Shkëlzen Gashi përpiqet të zhvendosë përgjegjësinë për këto gabime te Fondi për të Drejtën Humanitare, çka përbën përpjekje për të diskredituar bazën më të besueshme të të dhënave për viktimat e luftës në Kosovë.
Komunikata rikujton se të njëjtët autorë para dy vitesh kanë botuar librin “Masakrat në Kosovë”, i cili përmban pasaktësi dhe nuk është në përputhje me faktet e vërtetuara në gjykatë. I njëjti model po përsëritet në ekspozitë me të dhëna të pasakta, të bazuara në mungesë njohurie dhe pa përgjegjësi ndaj viktimave.
Fondi konsideron se ekspozita në formën aktuale duhet të hiqet nga hapësira publike. Reagimi kërkon ndërprerjen e paraqitjes arbitrare dhe joprofesionale të krimeve dhe fatit të viktimave, pasi paraqitja e pasaktë e fakteve dëmton kulturën e kujtesës, relativizon krimet dhe cenon dinjitetin e viktimave dhe familjeve të tyre.