Kanye West detyron Kairat Almaty të ndryshojë stadiumin

Klubi i futbollit Kairat Almaty nuk do të ketë mundësi të luajë në stadiumin e tij ndeshjen e kthimit të turit të tretë kualifikues të Ligës së Kampionëve kundër bullgarëve të Levski Sofia. Ndeshja, e cila është programuar për të martën, më 11 gusht, do të zhvillohet në Turkistan Arena, një impiant që ndodhet qindra kilometra larg qytetit të Almatit. Zhvendosja ka ardhur si pasojë e përgatitjeve për koncertin e reperit Kanye West, i cili pritet të mbahet në stadiumin e Kairatit më 14 gusht. Instalimi i skenës komplekse dhe i infrastrukturës teknike për shfaqjen kërkon punë të gjatë, duke e detyruar impiantin të mbetet i mbyllur për gara sportive gjatë gjithë javës. Sipas informacioneve, drejtuesit e klubit kazak shprehin pakënaqësi për këtë vendim, duke theksuar se nuk janë konsultuar paraprakisht nga organizatorët. Ky ndryshim pritet të ndikojë në performancën e skuadrës, e cila pas humbjes 1-0 në ndeshjen e parë në Bullgari, duhej të luante përballë tifozëve të saj për të synuar përmbysjen e rezultatit. Përkundër këtyre zhvillimeve, biletat për ndeshjen në Turkistan Arena, që ka një kapacitet prej 7 mijë vendesh, janë shitur plotësisht.