Alejandro Rosales Castillo, 27 vjeç, një nga dhjetë më të kërkuarit nga Agjencia Federale e Hetimeve (FBI) e SHBA-së, u arrestua të shtunën nga autoritetet ushtarike dhe policore meksikane në shtetin Hidalgo të Meksikës qendrore.
Ai akuzohet për vrasjen e Chuk Kwan “Sandy” Lei Laja, një vajze 23-vjeçare me origjinë vietnameze, me të cilën kishte punuar më parë në një restorant në Charlotte, Karolina e Veriut. Për informacion që çonte te arrestimi i tij, FBI kishte parashikuar një shpërblim prej 250 000 dollarësh.
Rosales Castillo ishte nën një njoftim të kuq të Interpolit dhe një urdhër-arrest për ekstradim. Akuzat përfshijnë vrasje të shkallës së parë, grabitje të armatosur, vjedhje makine dhe rrëmbim, njoftoi në rrjetin X Ministri i Sigurisë i Meksikës, Omar García Harfous.
Ambasadori amerikan në Meksikë, Ronald Johnson, përmes X-it përgëzoi arrestimin si rezultat të bashkëpunimit të ngushtë midis dy qeverive. Pas kapjes, i dyshuari u paraqit menjëherë para prokurorisë meksikane.
Sipas mediave amerikane, Rosales Castillo kishte pasur një lidhje të shkurtër me viktimën dhe kishte marrë hua para prej saj. Ai e kishte thirrur për t’u takuar duke premtuar pagesën e borxhit, por e rrëmbeu, e detyroi të tërhiqte kursimet nga një bankomat, e çoi në një zonë pyjore, e qëlloi me armë në kokë dhe hodhi trupin në një humnerë.