Ngjarja e rëndë ka ndodhur në Long Island, Nju Jork, ku shtetasi nga El Salvadori, Ronnie Yahir Alvarenga Rivera, akuzohet për vrasjen e dy grave në sulme të ndara me thikë brenda harkut kohor të disa orëve.
Sipas prokurores së Qarkut Nassau, Ann Donnelly, viktima e parë, Raquel Hernandez Castillo, 57 vjeçe, u gjet e vrarë më 30 prill. I dyshuari u tha hetuesve se ishte irrituar nga zhurmat e shkaktuara nga fqinja e tij, përfshirë ecjen me taka të larta dhe bisedat me zë të lartë në telefon. Sipas dosjes hetimore, ai e ka goditur viktimën rreth 50 herë me thikë.
Hetimet tregojnë se pas krimit të parë, 22-vjeçari vendosi të kryente një sulm të dytë, pasi kishte parashikuar arrestimin e tij. Viktima e dytë ishte Ana Maria de Águila Córdova, 42 vjeçe, nënë e tre fëmijëve, e cila punonte me të dyshuarin në një restorant. Sipas autoriteteve, Rivera e priti atë jashtë vendit të punës pas mesnatës së 1 majit dhe e goditi për vdekje me thikë, duke pretenduar se ishte ndier i “parespektuar” prej saj. Pas kësaj ngjarjeje, ai kontaktoi vetë policinë për të raportuar krimin, duke u thënë efektivëve: “Unë vrava dikë sonte”.
I dyshuari ka hyrë në Shtetet e Bashkuara në vitin 2016, kur ishte 12 vjeç. Aktualisht, ai ndodhet në proces gjyqësor, ku është deklaruar i pafajshëm ndaj akuzave të ngritura.