Një ngjarje e rëndë ka ndodhur pasditen e së hënës në Times Square, Nju Jork, ku një grua ka sulmuar me thikë dy persona të rastësishëm. 49-vjeçarja Pamela Cisneros, banuese në Queens, fillimisht plagosi një 68-vjeçar që po dilte nga stacioni i metrosë dhe më pas goditi për vdekje një 32-vjeçare. Pas sulmeve, ajo u largua drejt një nënstacioni të Departamentit të Policisë së Nju Jorkut (NYPD), ku u përball me efektivët.
Sipas komisioneres së policisë, Jessica Tisch, përpjekjet për negociata zgjatën rreth katër minuta, gjatë të cilave gruaja kërcënoi policët duke thënë se preferonte t'i vriste ata sesa të dorëzohej. Efektivët përdorën fillimisht një armë elektrike (Taser), por pa sukses, pasi ajo vazhdoi të afrohej me thikat në duar. Në këtë moment, dy oficerë hapën zjarr, duke e plagosur rëndë gruan, e cila më pas u shpall e vdekur në spital.
Autoritetet theksuan se 49-vjeçarja kishte një histori të dokumentuar të problemeve të shëndetit mendor, me incidente të regjistruara në vitet 2018 dhe 2019. Policia vijon hetimet për zbardhjen e plotë të motiveve, ndërsa kryebashkiaku i Nju Jorkut, Zohran Mamdani, vlerësoi reagimin e shpejtë të efektivëve për parandalimin e një përshkallëzimi të mëtejshëm të situatës. Viktima tjetër, 68-vjeçari, vazhdon të jetë nën kujdesin mjekësor në gjendje të qëndrueshme.
Përditësime
Hetuesit e NYPD konfirmuan se autorja Pamela Cisneros, banore e Queens, mbante dy thika të mëdha kuzhine brenda një çante pazari gjatë incidentit. Sulmi ndaj 68-vjeçarit ndodhi në çastin kur ai sapo kishte zbritur nga metroja dhe priste në trotuar me bashkëshorten për të kaluar rrugën. Burime policore raportuan se përpara se të qëllohej për vdekje, Cisneros tentoi të hiqte elektrodat e armës elektrike (Taser) të lëshuara nga oficerët në tentativën për ta neutralizuar.