Një 51-vjeçar është vënë në pranga nga Departamenti i Policisë së Nju Jorkut (NYPD) pas një serie sulmesh me thikë në qytet. I dyshuari, i identifikuar si Raul Morales, dyshohet se ka goditur dy burra, njëri prej të cilëve me origjinë aziatike dhe tjetri hebre, brenda një intervali të shkurtër kohor.
Sipas shefes së NYPD, Jessica Tisch, dëshmitarët dhe viktimat kanë konfirmuar se gjatë kryerjes së veprimeve, autori ka thirrur frazën "Allahu Ekber". Për këtë arsye, autoritetet po shqyrtojnë klasifikimin e ngjarjes si krim urrejtjeje. Aktualisht, hetuesit janë duke analizuar motivet e sakta të sulmeve, ndërsa po vlerësojnë edhe gjendjen mendore të të arrestuarit, pavarësisht se ai nuk rezulton me histori të mëparshme të çrregullimeve psikiatrike në të dhënat e policisë.
Viktimat e sulmit janë dërguar menjëherë në spital dhe ndodhen jashtë rrezikut për jetën. Lidhur me këtë ngjarje ka reaguar edhe kryebashkiaku i Nju Jorkut, Zohran Mamdani, i cili e ka dënuar ashpër dhunën, duke deklaruar se akte të tilla nuk do të tolerohen në komunitetin e qytetit. Hetimet mbi rastin mbeten të hapura për të zbardhur plotësisht dinamikën dhe shkaqet e sulmeve.
Përditësime
Policia e Nju Jorkut arrestoi 51-vjeçarin Morales, pasi u barrikadua në një ndërtesë pas dy sulmeve me thikë të ndodhura të enjten rreth orës 13:31 në Upper West Side, midis rrugës 84-të dhe 86-të pranë Central Park West. I dyshuari u lokalizua falë ndihmës së një kalimtari, ndërsa hetimet paraprake sugjerojnë se gjendja mendore e autorit ka qenë faktor kyç në incident.