Kapiteneria e Portit të Durrësit refuzoi më 28 gusht 2026 hyrjen e anijes cisternë “Hanuman” (numër IMO 9295048), e cila kishte kërkuar të ankorohej për furnizime me karburant, ujë, ushqime dhe riparime të mundshme. Vendimi për të mos lejuar hyrjen e anijes, e cila në momentin e kërkesës ishte bosh, u mor pas verifikimit se mjeti lundron nën flamurin e Sierra Leones dhe rezulton pjesë e listës së “flotës hije” ruse.
Sipas të dhënave të përditësuara nga Inteligjenca Ushtarake e Ukrainës (GUR) më 10 qershor 2026, kjo anije është përfshirë në transportin e naftës dhe produkteve të saj me origjinë ruse, duke shmangur kufirin e çmimit (“price cap”) dhe regjimin e embargos të vendosur nga G7 dhe Bashkimi Europian. Regjistrimet e GUR dokumentojnë se në shtator të vitit 2025, “Hanuman” ka transportuar mbi 30 mijë tonë produkte nafte nga porti rus i Novorossiysk drejt Turqisë.
Përveç kësaj, autoritetet ukrainase kanë evidentuar raste të fikjes së sistemit të identifikimit automatik (AIS) nga kjo anije, si dhe vizita të saj në porte të ndryshme, përfshirë ato ruse dhe ndalesa të mëparshme në Durrës. Vendimi i Kapitenerisë së Durrësit vjen në një kohë kur aktiviteti i anijeve të lidhura me transportin e naftës ruse po monitorohet nga afër nga autoritetet ndërkombëtare.
Përditësime
Autoritetet portuale sqaruan detajet teknike të kërkesës së paraqitur nga anija Hanuman, e identifikuar me IMO 9295048. Burime zyrtare konfirmuan se mjeti lundrues ishte bosh dhe nuk mbante ngarkesë nafte gjatë tentativës për hyrje në port. Kapiteni i anijes kërkoi ndërhyrjen për qëllime logjistike, konkretisht për furnizim me ujë, ushqime dhe kryerjen e riparimeve të domosdoshme.
Kapiteni i Portit të Durrësit, Taulant Allkja, konfirmoi se njoftimi për ndalimin iu komunikua anijes Hanuman ndërsa ajo ndodhej 12 milje larg bregut. Anija është udhëzuar të ndërpresë afrimin dhe aktualisht vijon lundrimin në ujërat e Adriatikut. Hetimet paraprake zbuluan se mjeti lundrues ka vizituar terminalin Sheskharis në Novorossiysk, pikë fundore e tubacioneve të Transneft.
Kapiteneria e Portit të Durrësit konfirmoi zyrtarisht për BIRN ndalimin e hyrjes së tankerit Hanuman. Hetimet e autoriteteve identifikuan ndalesa të mëparshme të anijes në portet e Kroacisë, Maltës dhe Greqisë, përveç vizitave të raportuara më parë.