Mirlinda Karçanaj, ish-drejtoresha e AKSHI, foli për herë të parë këtë të enjte në emisionin Top Story për hetimet e nisura nga SPAK ndaj saj. Akuzat lidhen me abuzime të pretenduara me tendera dhe ndryshimin e masës së sigurisë nga burgu në arrest shtëpie.
E pyetur për përgjegjësinë e saj, Karçanaj theksoi dallimin midis përgjegjësisë administrative dhe asaj penale. "Përgjegjësia administrative e drejtuesit të institucionit është të sigurojë mbarëvajtjen e punës, por nuk mund të shndërrohet në përgjegjësi penale", deklaroi ajo. Sipas saj, përgjegjësia penale është individuale dhe kushdo që ka kryer shkelje duhet ta mbajë atë.
Ajo shpjegoi se përgjegjësia administrative përfshin sigurimin që proceset të zhvillohen dhe hallkat të kryejnë detyrat, por nuk shtrihet në shkeljet e një hallke të veçantë ndaj ligjit.
Sa i përket hetimeve të SPAK-ut, Karçanaj u shpreh: "Si shumë qytetarë, para se të më kthehej bota përmbys, e kam parë SPAK me admirim, edhe pse sot e kam mbi kurriz si as në ëndrrat e mia më të këqija. Por nuk dua të besoj se nuk do të jenë të drejtë pasi të më pyesin dhe të më dëgjojnë, dhe hetimet të bëhen me dokumente e jo video të shkëputura totalisht nga konteksti".