FC Prishtina ka zyrtarizuar marrëveshjen me futbollistin Kastriot Selmani. Për 26-vjeçarin, ky transferim shënon rikthimin në klubin ku hodhi hapat e parë të karrierës dhe ku kaloi nëpër të gjitha grupmoshat e akademisë.
Lojtari i bashkohet skuadrës prishtinase pas një periudhe te kampionët e Shqipërisë, Egnatia. Gjatë kohës së tij në këtë ekip, Selmani regjistroi 42 paraqitje në të gjitha garat, duke përfshirë kampionatin, Kupën e Shqipërisë, si dhe ndeshjet kualifikuese të UEFA Champions League dhe UEFA Europa League.
Gjatë karrierës në futbollin kosovar, Selmani ka qenë pjesë e disa klubeve të njohura si Drita, Llapi dhe Vushtrria, me të cilat ka fituar trofe të ndryshëm. Prezantimi i tij u bë nga Mentor Zhdrella, i cili sapo ka marrë detyrën e drejtorit sportiv të FC Prishtina.
Pas nënshkrimit, Selmani u shpreh: "Rikthimi në Prishtinë për mua ka një domethënie të veçantë, pasi kthehem në vendin ku filluan ëndrrat e mia dhe ku ndërtova bazat e rrugëtimit tim sportiv. Ndihem i privilegjuar që do të kem mundësinë të vesh përsëri këtë fanellë dhe të kontribuoj për arritjen e objektivave të klubit".