FC Prishtina ka zyrtarizuar transferimin e mbrojtësit shqiptar Anio Poçi, i cili i bashkohet ekipit si lojtar i lirë pas përfundimit të kontratës me klubin e Egnatias. Lojtari pritet të përforcojë repartin defensiv për sezonin e ri 2026/27 në Superligën e Kosovës.
Në njoftimin e saj, FC Prishtina ka vlerësuar kontributin e Poçit në futbollin shqiptar, ku vitin e fundit u shpall kampion dhe zhvilloi 40 ndeshje në të gjitha garat. Përveç karrierës në Shqipëri, Poçi sjell përvojë edhe nga futbolli grek, ku ka qenë pjesë e skuadrave si Panionios dhe Proodeftiki.
Pas zyrtarizimit, futbollisti deklaroi se është i kënaqur për këtë mundësi dhe u zotua se do të japë maksimumin për arritjen e objektivave të klubit. Ky transferim pason afrimin e mëparshëm të Kastriot Selmanit nga e njëjta skuadër shqiptare, ndërsa procesi i ndërtimit të skuadrës për sezonin e ri po udhëhiqet nga trajneri Orges Shehi, i cili ndihmohet nga stafi i tij teknik: Sebino Plaku, Labinot Qosa dhe Alban Shala.