Klubi i futbollit FC Prishtina ka zyrtarizuar përfundimin e bashkëpunimit me trajnerin Alban Dragusha. Në njoftimin zyrtar të publikuar nga klubi, bëhet e ditur se vendimi është marrë me marrëveshje të dyanshme midis palëve.
Alban Dragusha kishte marrë drejtimin e shtabit teknik më 18 mars, duke zëvendësuar ish-trajnerin Afrim Tovërlani. Gjatë periudhës së tij në krye të ekipit, ai udhëhoqi skuadrën në 11 ndeshje të fazës së fundit të kampionatit. FC Prishtina e mbylli edicionin në vendin e shtatë me 49 pikë, duke mbetur jashtë pjesëmarrjes në garat evropiane.
Drejtuesit e klubit kanë vlerësuar kontributin profesional të Dragushës dhe e kanë falënderuar atë për përkushtimin e treguar. Ndërkohë, klubi ka nisur planifikimet për sezonin e ardhshëm dhe raportohet se janë duke zhvilluar bisedime me kandidatë të tjerë për postin e trajnerit, ku është përmendur emri i Orges Shehit.