Klubi i futbollit Dukagjini ka njoftuar të dielën se ka ndërprerë bashkëpunimin me trajnerin Arsim Thaçi, pas një marrëveshjeje të dyanshme. Përveç trajnerit, nga klubi janë larguar edhe ndihmëstrajnerët Valmir Bytyqi, Ahmet Haliti dhe Lekë Termkolli.
Në njoftimin zyrtar, drejtuesit e klubit shprehën mirënjohje për punën, përkushtimin dhe kontributin e stafit teknik gjatë periudhës së bashkëpunimit. Ata theksuan se ky grup ka qenë pjesë e rëndësishme e rrugëtimit të skuadrës nga Klina. Klubi i uroi ish-stafit suksese në angazhimet e tyre të ardhshme, si në aspektin profesional, ashtu edhe në atë personal.
Nën drejtimin e Arsim Thaçit, skuadra e Dukagjinit shënoi një sukses të konsiderueshëm duke fituar Kupën e Kosovës, pasi në ndeshjen finale mposhti Ferizajn. Ky trofe i mundësoi klubit pjesëmarrjen në raundin e dytë kualifikues të Ligës së Konferencës, ku Dukagjini u eliminua nga skuadra zvicerane Lugano.
Pas ndarjes nga Thaçi, mediat raportojnë se posti i trajnerit pritet t'i besohet Armend Dallkut, i cili e ka drejtuar këtë ekip edhe në të kaluarën.
Përditësime
Pas ndërprerjes së bashkëpunimit me trajnerin Arsim Thaçi, klubi i futbollit Dukagjini ka emëruar Armend Dallkun si kryetrajner të ri. Stafi teknik do të përbëhet nga ndihmëstrajnerët Artan Luzi e Agon Ramadani, ndërsa trajner i portierëve është caktuar Rinor Xhemaj.