Ministria e Brendshme e Katarit njoftoi më 22 mars se operacionet e shpëtimit kanë përfunduar dhe se shtatë persona kanë vdekur në rrëzimin e një helikopteri ushtarak në ujërat territoriale të këtij shteti.
“Të gjithë ata që ishin në bord u gjetën, shtatë persona, vdekja e të cilëve është konfirmuar”, tha Ministria e Brendshme.
Ministria e Mbrojtjes e Katarit identifikoi katër pjesëtarë të personelit ushtarak të saj si viktima. Helikopteri u rrëzua për shkak të “problemeve teknike” gjatë një fluturimi rutinë.
Ministria e Mbrojtës e Turqisë shpjegoi se helikopteri i forcave të armatosura të Katarit po kryente një stërvitje si pjesë e Komandës së Përbashkët Katar-Turqi kur u rrëzua në det. Midis viktimave turke ishte një pjesëtar i forcave të armatosura të Turqisë dhe dy teknikë nga kompania turke e armëve Aselsan.
Këto janë viktimat e para nga Katari dhe Turqia që kur Shtetet e Bashkuara dhe Izraeli nisën sulme ndaj Iranit më 28 shkurt, ndërsa Republika Islamike nisi sulme hakmarrëse ndaj fqinjëve në Gjirin Persik.
Në javët e fundit, gjatë konfliktit mes SHBA-së, Izraelit dhe Iranit, infrastruktura energjetike në Katari dhe vende të tjera të Gjirit Persik ka qenë në shënjestër të sulmeve ajrore.
Më 17 mars, Katari dëboi atashetë ushtarakë dhe të sigurisë të Ambasadës Iraniane në Dohë.