Policia e Kosovës ndëshkoi katër shoferë në Ferizaj, pasi i kapi duke drejtuar automjete nën ndikimin e alkoolit. Sipas njoftimit të Policisë Rajonale të Ferizajt, rastet u evidentuan në rrugët “Brahim Ademi” dhe “Remzi Hoxha”. Zyrtarët policorë ndaluan drejtuesit dhe i testuan me alkooltest.
A.L., 54 vjeç, rezultoi me 1.73 promilë alkool në gjak. Atij iu shqiptua gjobë prej 400 eurosh, tri pikë negative dhe ndalim i drejtimit të automjetit për nëntë muaj.
J.M., 49 vjeç, rezultoi me 1.44 promilë alkool. Ai u dënua me gjobë prej 300 eurosh, dy pikë negative dhe ndalim të drejtimit për gjashtë muaj. SH.SH., 25 vjeç, kishte 1.19 promilë alkool në gjak dhe mori të njëjtat masa: gjobë prej 300 eurosh, dy pikë negative dhe ndalim të drejtimit për gjashtë muaj.
L.A., 56 vjeç, rezultoi me 0.63 promilë alkool. Atij iu shqiptua gjobë prej 200 eurosh, dy pikë negative dhe ndalim i drejtimit të automjetit për tre muaj.
Policia Rajonale e Ferizajt u bëri thirrje pjesëmarrësve në trafik të mos drejtojnë automjete nën ndikimin e alkoolit. Sipas Policisë, një veprim i tillë rrezikon jetën e drejtuesve dhe sigurinë e qytetarëve të tjerë.