Policia e Ferizajt ndëshkon dhjetëra shoferë për shkelje rrugore

Gjatë kontrolleve të shtuara të realizuara në orët e hershme të 26 korrikut, Policia Rajonale e Ferizajt ka shqiptuar masa ndëshkimore për gjashtë drejtues mjetesh. Katër prej tyre janë ndaluar në rrugën “Dëshmorët e Kombit”, pasi u konstatuan duke drejtuar automjetet nën ndikimin e alkoolit.

Shoferi V.B. (25 vjeç) rezultoi me 1.11 promila alkool në gjak, duke u dënuar me 300 euro gjobë, dy pikë negative dhe ndalim të drejtimit për gjashtë muaj. Tre shoferët e tjerë (RR.N., O.T. dhe Ç.B.) u gjobitën me nga 200 euro, dy pikë negative dhe tre muaj pezullim të lejes për shkak të nivelit të alkoolit që varionte nga 0.86 deri në 1.00 promila.

Në të njëjtën ditë, në rrugën magjistrale në fshatrat Bibaj dhe Koshare, dy shoferë të tjerë u ndëshkuan për shpejtësi tej kufizimeve ligjore. K.K. (18 vjeç) u gjobit me 300 euro për drejtim mjeti me 102 km/h në zonën ku kufizimi ishte 40 km/h, ndërsa E.M. (26 vjeç) u penalizua me 200 euro pasi lëvizte me 80 km/h në një zonë me kufizim 50 km/h.

Aksioni për shiritin emergjent

Në një aksion të zhvilluar më 25 korrik, autoritetet policore ndëshkuan pesë shoferë të tjerë për kundërvajtje të rënda në dalje të autostradës në Bibaj. Këta drejtues mjetesh kishin tejkaluar kolonën përmes shiritit emergjent. Për këtë shkelje, katër shoferëve me patentë të Kosovës u është shqiptuar gjobë prej 300 euro, 3 pikë negative dhe masë ndalimi e drejtimit për një vit. I njëjti ndalim njëvjeçar iu vendos edhe një shoferi me patentë të huaj, i cili u gjobit gjithashtu me 300 euro.

Policia e Ferizajt ka njoftuar se aktivitetet e monitorimit do të vijojnë për rritjen e sigurisë në komunikacion. Qytetarët janë ftuar të raportojnë parregullsitë përmes numrit emergjent 192 ose aplikacionit “Lajmëro Policinë”.