Katër persona janë pranuar në Qendrën Emergjente të Qendrës Klinike Universitare të Kosovës (QKUK) pas plagëve të marra nga përdorimi i armëve të zjarrit në Podujevë.
Drejtori i Klinikës Emergjente, Naser Syla, bëri të ditur se të gjithë të lënduarit janë të moshës së mesme dhe ndodhen në gjendje të rëndë, por stabile.
"Janë pranuar katër persona me plagë të rënda nga arma e zjarrit. Njëri prej tyre është dërguar në sallën operative për ndërhyrje nga njësia e neurokirurgjisë, ndërsa tre të tjerët po i nënshtrohen ekzaminimeve dhe trajtimit të mëtejshëm mjekësor", deklaroi Syla.
Zëdhënësja e Prokurorisë Themelore në Prishtinë, Kaltrina Shala, ka konfirmuar për mediat se, bazuar në të dhënat fillestare, nuk raportohet për viktima. Organet e rendit dhe Prokuroria kanë nisur hetimet për zbardhjen e rrethanave të këtij incidenti.
Përditësime
Zëdhënësi i policisë, Enis Pllana, ka konfirmuar se numri i të plagosurve nga të shtënat në Sheshin e Podujevës ka shkuar në katër. Incidenti, i cili ndodhi rreth orës 13:30, u shkaktua nga përdorimi i armëve të gjahut.