Spitali i Përgjithshëm në Pejë ka njoftuar se mbrëmë kanë pranuar tre pacientë të plagosur me armë zjarri në një lokal në Deçan të Kosovës.
Sipas njoftimit zyrtar të spitalit, pas dhënies së ndihmës së parë mjekësore, dy pacientë janë bartur për trajtim të mëtejshëm në Qendrën Klinike Universitare të Kosovës (QKUK). Pacienti i tretë po vazhdon trajtimin në Spitalin e Përgjithshëm në Pejë dhe gjendet jashtë rrezikut për jetën.
"Mbrëmë në Spitalin e Përgjithshëm në Pejë janë pranuar tre pacientë të plagosur me armë zjarri. Pas dhënies së ndihmës së nevojshme mjekësore, dy pacientë janë bartur për trajtim të mëtejmë në Qendrën Klinike Universitare të Kosovës (QKUK). Një pacient po vazhdon trajtimin në Spitalin e Përgjithshëm në Pejë dhe gjendet jashtë rrezikut për jetën", thuhet në njoftimin e spitalit.
Policia e Kosovës ka njoftuar se i dyshuari për ngjarjen është arrestuar dhe është dërguar në mbajtje për 48 orë. Hetimet po vazhdojnë për sqarimin e rrethanave të incidentit.
Përditësime
Shkodran Nikçi, zëdhënës i Prokurorisë, deklaroi se policia ka arrestuar një person në vendngjarje pas ngjarjes së ndodhur pas mesnatës në rrugën Luan Haradinaj në Deçan. Policia dhe prokuroria ndërhynë menjëherë. Dy nga të plagosurit janë serbë, ndërsa i treti është një avokat shqiptar.