Një këmbësore 67-vjeçare humbi jetën pasi u godit nga një automjet në zonën e Urës së Bahçallëkut, në Shkodër, rreth orës 15:40 të 1 nëntorit. Sipas njoftimit paraprak të policisë, automjeti drejtohej nga shtetasja B. P., 27 vjeçe, e cila dyshohet se humbi kontrollin mbi drejtimin e mjetit.
Automjeti doli nga rruga dhe u përplas me shkallët metalike të një ndërtese pranë. Më pas goditi këmbësoren, shtetasen E. B., e cila po ecte në trotuar. Ajo humbi jetën si pasojë e aksidentit.
Në vendngjarje mbërritën shërbimet e policisë dhe grupi hetimor. Sipas njoftimit zyrtar, grupi po punon për sqarimin e rrethanave dhe përcaktimin e shkakut të aksidentit.