Prokuroria Themelore në Ferizaj, përmes Departamentit për të Mitur, ka kërkuar nga Gjykata Themelore në Ferizaj caktimin e masës së paraburgimit prej 30 ditësh ndaj dy të pandehurve, B.G. dhe E.L., për shkak të dyshimit të bazuar për veprën penale të “Dhunimit”, sipas nenit 227 të Kodit Penal të Republikës së Kosovës.
Sipas hetimeve, ngjarja dyshohet se ka ndodhur më 21 shtator 2026 në një zonë malore, përkatësisht në një park në fshatin Begracë të Kaçanikut, ku të pandehurit akuzohen për keqpërdorimin seksual të dy të miturave. Rasti ishte denoncuar fillimisht në polici nga viktimat në shoqërinë e prindërve të tyre, pas çka Prokurori i Shtetit autorizoi nisjen e procedurave hetimore.
Në kuadër të veprimeve procedurale, viktimat ishin dërguar për ekzaminim gjinekologjik në Institutin e Mjekësisë Ligjore në Prishtinë, mirëpo ato kanë refuzuar t’i nënshtrohen këtij ekzaminimi. Të pandehurit B.G. dhe E.L. janë ndaluar nga autoritetet që nga data 22 shtator 2026 me vendim të Prokurorit të Shtetit dhe aktualisht ndodhen nën masën e ndalimit deri në vendimin e gjykatës lidhur me kërkesën për paraburgim.