Prokuroria Themelore në Prizren i është drejtuar Gjykatës Themelore në Prizren me kërkesë për caktimin e masës së paraburgimit ndaj dy të pandehurve, B.H. dhe I.H., në lidhje me vrasjen e imamit G.T. në fshatin Zlipotok të Komunës së Dragashit.
Sipas hetimeve, ngjarja ka ndodhur më 29 qershor 2026, rreth orës 23:00. Dyshohet se motivi i krimit është një mosmarrëveshje e hershme ndërmjet të pandehurit B.H. dhe viktimës G.T., lidhur me shfrytëzimin e një prone (livadhi). B.H. akuzohet se ka privuar nga jeta viktimën duke përdorur një mjet të mprehtë (thikë), çka solli vdekjen e G.T. në vendin e ngjarjes. Për këto veprime, ai dyshohet për kryerjen e veprës penale "Vrasja e rëndë" sipas nenit 173 të Kodit Penal të Republikës së Kosovës.
Ndërkohë, i pandehuri I.H., i cili është babai i B.H., dyshohet për veprën penale "Mosdhënia e ndihmës" sipas nenit 188 të Kodit Penal. Prokuroria njofton se, ndonëse ai ishte në afërsi të vendit të ngjarjes dhe kishte mundësi ta ndihmonte viktimën pa rrezikuar veten apo të tjerët, nuk ka ndërmarrë veprimet e nevojshme për ta ndihmuar atë, përkundër faktit se viktima ndodhej në rrezik të drejtpërdrejtë për jetën.