Prokuroria Themelore në Prizren ka paraqitur kërkesën pranë Gjykatës Themelore për caktimin e masës së paraburgimit ndaj tre të dyshuarve për vrasjen e ndodhur në fshatin Kobaj. Sipas dosjes së prokurorisë, konflikti që çoi në tragjedi ka zanafillën nga mosmarrëveshjet e mëhershme lidhur me emërtimin e një rruge në lagjen e banimit të palëve.
Ngjarja ka nisur si një përplasje verbale, e cila ka eskaluar në konflikt fizik. Gjatë përleshjes, të dyshuarit Sh. O. dhe një shtetas i mitur, dyshohet se kanë përdorur thika për të goditur viktimën A. O. dhe të dëmtuarin I. O. Si pasojë e plagëve të marra në gjoks, viktima A. O. ka ndërruar jetë, ndërsa personi tjetër ka pësuar lëndime të rënda trupore dhe po trajtohet në Spitalin Rajonal të Prizrenit.
Sipas akuzës, e dyshuara A. O., nëna e të pandehurve, akuzohet për veprën penale të shtytjes në kryerjen e vrasjes së rëndë. Të dyshuarit ndodhen aktualisht nën masën e ndalimit policor. Organet e drejtësisë po vijojnë hetimet për zbardhjen e plotë të rrethanave të ngjarjes.