KESCO njofton konsumatorët se furnizimi me energji elektrike është stabilizuar, pas normalizimit të gjendjes në sistemin elektroenergjetik dhe zbatimit të masave të koordinuara për balancimin e ngarkesës.
Rritja e prodhimit vendor ka kontribuar në këtë stabilizim, pas kthimit të bllokut B1 në funksion. Megjithatë, kërkesa për konsum vazhdon të jetë e lartë, prandaj KESCO mbulon nevojën përmes importit, pavarësisht sfidave në treg dhe kërkesës së rritur në rajon.
Kompania vazhdon të ndërmarrë të gjitha veprimet e nevojshme për të siguruar furnizim të qëndrueshëm dhe stabil për konsumatorët. KESCO falënderon klientët për mirëkuptimin dhe bashkëpunimin e deritanishëm.
KESCO apelon që të vazhdojë kursimi i energjisë elektrike, veçanërisht në orët e pikut, për mbarëvajtjen e sistemit dhe furnizimin e qëndrueshëm për të gjithë. Kompania mbetet e përkushtuar ndaj koordinimit të vazhdueshëm me institucionet përgjegjëse dhe partnerët e sektorit.