Në një mbledhje emergjente të zhvilluar ditën e sotme, Këshilli Bashkiak i Dimalit rrëzoi propozimin për shkrirjen e kësaj bashkie dhe bashkimin e saj me Bashkinë Berat. Gjatë mbledhjes, anëtarët e këshillit shqyrtuan relacionin e paraqitur, i cili argumentonte bashkimin përmes lidhjeve historike, ndarjeve të dikurshme administrative, shtrirjes përgjatë lumit Osum dhe shërbimeve spitalore në Berat.
Këshilltarët kundërshtuan këto argumente, duke u shprehur se ato nuk përputhen me analizën e raportit të ekspertëve. Sipas këshilltarëve, Bashkia Dimal ka treguar performancë më të lartë në investime krahasuar me Bashkinë Berat. Të dhënat e paraqitura në mbledhje treguan se Dimali ka realizuar një mesatare prej 38% të investimeve nga buxheti i saj aktiv në 10 vitet e fundit, duke u renditur e pesta në vend, ndërsa Berati ka një mesatare prej 7%.
Sipas këshilltarëve, shkrirja e planifikuar mund të shkaktojë pasoja negative për ekonominë vendore, veçanërisht për fermerët që realizojnë eksporte bujqësore dhe të serave në tregjet ndërkombëtare. Në përfundim, 18 nga 21 anëtarët e pranishëm votuan për shpalljen e pavlefshmërisë së relacionit dhe miratuan qëndrimin zyrtar kundër shkrirjes së bashkisë. Ky proces është vlerësuar nga anëtarët e këshillit si në kundërshtim me nenin 89, pasi mungojnë faktet dhe studimet e nevojshme të fizibilitetit. Kryetari i këshillit, Avdulla Salillari, drejtoi diskutimet mbi këtë çështje.
Përditësime
Këshilltarët bashkiakë të Partisë Socialiste dhe Partisë Demokratike bashkuan votat në mbledhjen e së hënës kundër shkrirjes së bashkisë. Relacioni i propozuar mbështetej në lidhjet historike dhe ekzistencën e Spitalit Rajonal në Berat si argumente kryesore për këtë bashkim, propozim i cili u hodh poshtë nga shumica e anëtarëve të këshillit.