Presidenti i Këshillit Evropian, António Costa, deklaroi se do të thërrasë një mbledhje të jashtëzakonshme të Këshillit Evropian në ditët në vijim. Kjo nismë vjen në dritën e zhvillimeve të fundit në lidhje me Groenlandën dhe synon forcimin e koordinimit të qëndrimeve evropiane.
Sipas postimit të tij në rrjetet sociale, konsultimet me shtetet anëtare konfirmuan angazhimin e përbashkët të Bashkimit Evropian për parimet themelore. Ai nënvizoi unitetin në mbështetje të Danimarkës dhe Groenlandës, si dhe interesin transatlantik për paqen dhe sigurinë në Arktik, me rol kyç të NATO-s.
Costa vlerësoi se vendosja e tarifave do të dëmtonte marrëdhëniet transatlantike dhe do të binte në kundërshtim me marrëveshjen tregtare mes BE-së dhe SHBA-së. Ai theksoi gatishmërinë e Evropës për t’u mbrojtur ndaj çdo forme presioni apo shtrëngimi, duke ruajtur vullnetin për dialog konstruktiv me Uashingtonin.
Gjashtë pikat kryesore të angazhimeve të Bashkimit Evropian janë:
• Unitet mbi parimet e së drejtës ndërkombëtare, integritetit territorial dhe sovranitetit kombëtar;
• Unitet në mbështetje dhe solidaritet me Danimarkën dhe Groenlandën;
• Njohje e interesit të përbashkët transatlantik për paqen dhe sigurinë në Arktik, veçanërisht duke punuar përmes NATO-s;
• Vlerësim i përbashkët se tarifat do të dëmtonin marrëdhëniet transatlantike dhe janë të papajtueshme me marrëveshjen tregtare BE-SHBA;
• Gatishmëri për t’u mbrojtur kundër çdo forme shtrëngimi;
• Gatishmëri për të vazhduar angazhimin konstruktiv me SHBA-në për çështjet me interes të përbashkët.
Kjo zhvillim ndodh në kontekstin e planeve të presidentit amerikan Donald Trump për aneksimin e Groenlandës dhe vendosjen e tarifave doganore ndaj vendeve të NATO-s që kundërshtojnë veprimet e tij.