Më 26 shkurt, Komisioni Evropian i paraqiti vendeve anëtare Raportin e Vlerësimit të Pikave të Ndërmjetme (IBAR) për grupkapitullin e parë, Themeloret, në kuadër të negociatave për anëtarësimin e Shqipërisë në Bashkimin Evropian.
Në dy mbledhje të Grupit të Punës për Zgjerimin dhe vendet Negociuese me BE (COELA), më 6 dhe 13 mars, ambasadorët e vendeve anëtare diskutuan raportin. Ky proces kërkon unanimitet për miratimin e një draft pozicioni të përbashkët të ndërmjetëm. Këshilli i Bashkimit Evropian njoftoi se nuk ka afat të paracaktuar për vendimin dhe se çështja do të trajtohet në mbledhje të tjera në javët dhe muajt në vijim.
Shqipëria hapi në kohë rekord të gjithë grupkapitujt e negociatave. Miratimi i IBAR-it për grupkapitullin e parë është hapi i radhës për të kaluar në fazën e mbylljes së tyre.
Shtyrja dhe shqetësimet e vendeve anëtare
Shtyrja tregon se disa vende anëtare kanë ngritur pikëpyetje. Burime diplomatike rendisin Gjermaninë në krye, të mbështetur nga Hollanda dhe Suedia. Këto vende reaguan me deklarata në ditën kur Kuvendi shqiptar votoi kundër kërkesës për arrestimin e ish-zëvendëskryeministres Belinda Balluku, duke e lidhur çështjen me ecurinë e negociatave.
Këshilli i BE-së refuzoi të japë detaje për qëndrimet individuale të shteteve anëtare, duke thënë se kjo do të dëmtonte pozicionet negociuese.
Kryeministri Edi Rama pranoi se kishte pasur debate me përfaqësues të disa vendeve anëtare për rastin Balluku, por mohoi se kjo kishte bllokuar rrugën e Shqipërisë drejt BE-së.
Përditësime
Komisioni Evropian ka konfirmuar dorëzimin e një vlerësimi pozitiv për përmbushjen e IBAR-it të Shqipërisë në grupkapitullin "Themeloret", si dhe një projekt-Qëndrim të Përbashkët.
Sipas KE-së: "Tani u takon Shteteve Anëtare të bien dakord për një Qëndrim të Përbashkët të BE-së mbi Grupin 1, i cili do të përcaktojë standardet përfundimtare në fushën e Sundimit të Ligjit".
Këshilli i BE-së synon marrëveshje mbi "draft-pozicionin e përbashkët të ndërmjetëm të BE-së për Grupkapitullin e parë".