Vendet anëtare të Bashkimit Europian kanë miratuar raportin e Vlerësimit të Standardeve të Përkohshme (IBAR) për Shqipërinë. Ky hap shënon përparim në procesin e negociatave për anëtarësim.
Raporti ka kaluar fazën teknike në grupin e punës COELA dhe pritet të miratohet nesër nga ambasadorët e vendeve anëtare në mbledhjen e COREPER. Miratimi formal do të hapë rrugën për mbajtjen e Konferencës Ndërqeveritare më 26 maj.
IBAR lidhet me grupkapitullin “Themeloret”, që përfshin fusha si shteti i së drejtës, reforma në drejtësi, të drejtat themelore, institucionet demokratike dhe administrata publike. Pas kësaj faze, Shqipëria mund të kalojë në procesin e mbylljes së kapitujve të negociatave.
Kryeministri Edi Rama do të përfaqësojë vendin në Konferencën Ndërqeveritare. Kreu i grupit parlamentar të PS-së, Taulant Balla, theksoi se Shqipëria po përmbyll një fazë të rëndësishme të integrimit europian.