Këshilli i Lartë Gjyqësor (KLGJ) miratoi 41 vende vakante për ndihmës ligjorë në gjykatat e shkallës së parë dhe të apelit.
Ky vendim u përshëndet nga Ministri i Drejtësisë Besfort Lamallari, i cili e cilësoi si lajm të mirë dhe hap konkret për përmirësimin e sistemit të drejtësisë.
Sipas deklaratës së tij, ky hap shërben drejtpërdrejt uljes së stokut të dosjeve dhe përshpejtimit të procesit të dhënies së drejtësisë, një nga problematikat më të ndjeshme të sistemit gjyqësor në vend.
Ministri përmendi se kishte shtruar nevojën për këtë ndërhyrje në takimin e së hënës për nisjen e vitit të ri gjyqësor. Ai theksoi se shtimi i kapaciteteve dhe forcimi i burimeve njerëzore nuk është thjesht masë administrative, por zgjedhje politike në funksion të qytetarëve, për një drejtësi më efikase, më të shpejtë dhe më të besueshme, me standarde demokratike si në vendet e Bashkimit Evropian.
Deklarata e plotë e Lamallarit: «Vendimi i Këshillit të Lartë Gjyqësor për miratimin e 41 vendeve vakante për ndihmës ligjorë në gjykatat e shkallës së parë dhe të apelit është një lajm i mirë. Një hap konkret që i shërben drejtpërdrejt uljes së stokut të dosjeve dhe përshpejtimit të dhënies së drejtësisë. E shtrova nevojën e kësaj ndërhyrjeje edhe në takimin e së hënës për nisjen e vitit të ri gjyqësor. Shtimi i kapaciteteve dhe forcimi i burimeve njerëzore në sistemin tonë të drejtësisë nuk është thjesht një masë administrative, por një zgjedhje politike në funksion të qytetarëve, për një drejtësi më efikase, më të shpejtë dhe më të besueshme. Sigurisht edhe me standarde të panegociueshme demokratike njësoj si në vendet e Bashkimit Evropian».