Ministri i Drejtësisë Toni Gogu deklaroi se raporti i vlerësimit të piketave të ndërmjetme IBAR për Shqipërinë ka kaluar nga grupi i punës në grupin e ambasadorëve të vendeve anëtare të Bashkimit Evropian. Sipas ministrit, ky hap tregon se procesi po lëviz përpara dhe ka marrë mbështetje institucionale.
Gogu njoftoi se në 18 muajt e fundit janë koordinuar 70 institucione dhe janë përgatitur mbi 8 mijë faqe dokumentacion për Komisionin Evropian. Ai theksoi se cilësia e reformave po vlerësohet në raportet ndërkombëtare dhe se Shqipëria po ecën drejt përmbushjes së standardeve për anëtarësim.
Ministri prezantoi rezultatet e një ankete rajonale mbi sistemin e drejtësisë. Besimi i qytetarëve është rritur nga 26% në 53%, pavarësia e sistemit është perceptuar më lart me 30%, ndërsa perceptimi negativ ka rënë nga 38% në 17%. Shifra negative mbetet ajo e lidhur me numrin e çështjeve të mbartura dhe vështirësitë financiare për qytetarët.
Gjykata e Lartë ka ulur stokun e çështjeve me 60% krahasuar me vitin 2020, ndërsa për herë të parë sistemi gjyqësor ndodhet në trajektore ulëse. Ministri paraqiti tri prioritetet strategjike të ministrisë: fuqizimin e garancive procedurale dhe të drejtave të njeriut, rritjen e efikasitetit të sistemit gjyqësor dhe përmirësimin e aksesit të qytetarëve në drejtësi.
Gogu bëri të ditur se ka filluar puna për ndërtimin e godinës së re të Gjykatës së Apelit dhe për rritjen e kapaciteteve njerëzore në gjykata. Ai shtoi se janë kryer rreth 450 kontrolle dhe 74 inspektime sigurie në institucionet penitenciare.