Procesi i rivlerësimit kalimtar të gjyqtarëve dhe prokurorëve pritet të përfundojë brenda qershorit të vitit 2026. Ministri i Drejtësisë, Toni Gogu, bëri të ditur shifrat e bilancit gjatë një tryeze trepalëshe të zhvilluar me përfaqësues nga Shqipëria, Rumania dhe Moldavia.
Sipas të dhënave, nga 417 vendime të dhëna, 56% kanë rezultuar me shkarkim, ndërsa 44% me konfirmim në detyrë. Ministri Gogu theksoi se ky proces është një gur themeli në forcimin e shtetit të së drejtës. Në kuadër të mbështetjes institucionale, buxheti i konsoliduar për drejtësinë për vitin 2026 është planifikuar në vlerën 296 milionë euro. Gjithashtu, u raportua se Gjykata e Lartë ka ulur me 60% numrin e dosjeve të prapambetura krahasuar me vitin 2020, ndërsa sistemi digjital JURONIX po vijon punën për arkivimin e 13 milionë faqeve të vendimeve gjyqësore që datojnë nga viti 1950.
Gjatë tryezës, e cila u fokusua në rolin e parlamentit dhe bashkëpunimin ndërkufitar, Gogu pranoi se Raporti i Komisionit Europian mbi Sundimin e Ligjit i vitit 2025 ka evidentuar nevojën për forcim të mbikëqyrjes parlamentare mbi ekzekutivin dhe rritje të meritokracisë në proceset e emërimeve. Diskutimi shërbeu si një platformë për ndarjen e përvojave me Rumaninë si vend anëtar i Bashkimit Europian dhe Moldavinë si shtet në proces ndërtimi institucional.