Këshilli Mbikëqyrës i Bankës së Shqipërisë zhvilloi sot, më 4 mars 2026, mbledhjen e parë pas më shumë se dy muajsh, që nga dhjetori, pas zgjedhjes së anëtarëve të rinj nga Kuvendi i Shqipërisë në shkurt.
Në mbledhje u miratua Raporti Vjetor i Bankës së Shqipërisë për vitin 2025. Ky raport përbën detyrim ligjor për bankën dhe shërben për llogaridhënien para Kuvendit të Shqipërisë, si dhe për komunikimin me sistemin financiar, mediat dhe publikun. Ai informon në mënyrë transparente mbi vendimmarrjen e Këshillit Mbikëqyrës dhe veprimtarinë e bankës në përmbushje të objektivave institucionalë, monetarë, operacionalë dhe zhvillimorë.
Raporti pasqyron:
- zhvillimet e përgjithshme makroekonomike në vend;
- politika monetare dhe valutore e ndjekur nga Banka e Shqipërisë;
- zhvillimet në sistemin bankar dhe rreziqet potenciale me të cilat përballet stabiliteti financiar;
- aktivitetin mbikëqyrës, licencues dhe rregullator;
- aktivitetin e emisionit monetar, sistemit të pagesave, administrimit të rezervës valutore, statistikor, kërkimor, komunikues dhe edukimit të publikut;
- administrimin e burimeve njerëzore;
- veprimtarinë e kontrollit të brendshëm;
- objektivat afatmesëm të institucionit.
Pas prezantimit në Kuvend, raporti do të publikohet në faqen zyrtare të Bankës së Shqipërisë.
Gjatë mbledhjes u miratua gjithashtu përdorimi i fitimit të Bankës së Shqipërisë për vitin 2025. Këshilli u njoh me informacione të tjera lidhur me veprimtarinë e përditshme funksionale dhe operacionale të bankës.
Nuk u njoftua miratimi i raportit të radhës së politikës monetare apo vendimmarrje e re për normën bazë të interesit.
Përditësime
Këshilli Mbikëqyrës i BSH-së konfirmoi anëtarët e rinj Selami Xhepa, Ervin Mete, Holta Zacaj dhe Jonida Prifti, duke zhbllokuar vendimmarrjen në mbledhjen e parë.