Këshilli për Rregulloren, Mandatet dhe Imunitetin do të mblidhet më 28 janar 2026, në orën 12:00, në Kryesinë e Kuvendit, për të vazhduar shqyrtimin e kërkesës së Prokurorisë së Posaçme kundër Korrupsionit dhe Krimit të Organizuar (SPAK). Kërkesa ka për objekt dhënien e autorizimit nga Kuvendi për arrestimin ose heqjen e lirisë së deputetes dhe zëvendëskryeministres Belinda Balluku, përmes zëvendësimit të masës së sigurimit, sipas Kushtetutës dhe Rregullores së Kuvendit.
Mbledhja thirret me Urdhrin nr. 3, datë 12 janar 2026, nga kryeparlamentari Niko Peleshi. Kjo datë vjen një javë pas shqyrtimit të pritshëm nga Gjykata Kushtetuese i ankimimit të Këshillit të Ministrave për masën e sigurimit "pezullim nga detyra" ndaj Belinda Balluku. Gjykata Kushtetuese ka pezulluar tashmë këtë masë dhe pritet të japë vendimin përfundimtar më 22 janar 2026.
Kujtohet se mbledhja e fundit e Këshillit u zhvillua më 19 dhjetor 2025 dhe zgjati rreth 5 orë, në prani të kryeprokurorit të SPAK-ut, Klodian Braho, dhe prokurorëve të çështjes. Gjatë saj, SPAK-u paraqiti një USB me 16 mijë faqe prova për të mbështetur kërkesën për arrestimin e Belinda Balluku. Kjo USB u dorëzua anëtarëve të Këshillit. Avokatët e saj kërkuan 2 javë kohë për shqyrtimin e materialit, ndërsa Prokuroria e Posaçme vlerësoi se 3 ditë janë të mjaftueshme.
SPAK-u ka ngritur akuza ndaj Belinda Balluku, e cila mban postin e zëvendëskryeministres dhe ministre të Infrastrukturës dhe Energjisë. Procedura ndjek rregullat kushtetuese për deputetët dhe zyrtarët e lartë.