Kuvendi do të mblidhet nesër, më 5 mars 2026, për seancën e radhës plenare. Në rend të ditës janë parashikuar diskutime dhe miratime për disa projektligje, por nuk është përfshirë çështja e heqjes së imunitetit të deputetes Belinda Balluku.
SPAK ka kërkuar arrestimin e saj dhe heqjen e imunitetit si deputete. Belinda Balluku, ish-zëvendëskryeministre dhe ish-ministre e Infrastrukturës dhe Energjisë, u shkarkua javën e kaluar nga këto poste. Ajo përballet zyrtarisht me akuzën për shkeljen e barazisë në tenderat e tunelit të Llogarasë dhe është nën hetim për procedura të tjera tenderuese, përfshirë Loten e Unazës së Madhe.
Në mbledhjen e Këshillit të Mandateve, SPAK argumentoi se kërkesa për arrest vjen për shkak se pozitat e saj janë rënduar dhe ka dyshime se ka përdorur persona të fortë dhe zyrtarë publikë për të intimiduar dëshmitarët.
Dy ditë më parë, Grupi i PD-së depozitoi raportin e tyre pas mbledhjes së Këshillit të Mandateve, ku argumentojnë se Kuvendi duhet të votojë pro heqjes së imunitetit. Socialistët, që do të paraqesin një raport të veçantë, nuk e kanë publikuar ende atë.