Një këshilltar i partisë në pushtet në Vishegrad, në lindje të Bosnjë e Hercegovinës, ka promovuar lëvizjen ultranacionaliste ruse të njohur si Rusov (Lëvizja Ndërkombëtare Bashkimi dhe Ringjallja Ruso-Sllave). Kjo organizatë, lideri i së cilës, Andrei Rodionov, ka vizituar disa herë rajonin, mban lidhje të ngushta me grupe të ekstremit të djathtë në Serbi.
Fotografia dhe simbolika në kodrën Zagllavak
Në prill, kanali i grupit në Telegram publikoi një fotografi të Velibor Zekoviqit, këshilltar i Partisë Socialiste të Republikës Serbe në kuvendin komunal të Vishegradit. Ai shihet duke pozuar me flamurin e organizatës në kodrën Zagllavak, në shoqërinë e Zhellko Gjuroviqit. Ky i fundit, rreth dhjetë vjet më parë, drejtonte degën serbe të lëvizjes Fronti i Kosovës, entitet që autoritetet ukrainase e kanë cilësuar si organizator të dërgimit të luftëtarëve nga Ballkani në frontin e luftës në Ukrainë. Në përshkrimin e imazhit, dyshja identifikohet si “aleatë serbë të lëvizjes Rusov”. Fotografia është realizuar pranë një kryqi të improvizuar nga kontejnerë bosh të granatahedhësve, në një vend ku gjatë luftës së viteve ’90 kanë luftuar vullnetarë rusë krah për krah me forcat serbe.
Ndikimi politik dhe ideologjik
Gazetari nga Banjalluka, Gjorgje Vujatoviq, e cilëson si paradoksale përpjekjen e partive që vetëquhen socialiste për të flirtuar me organizata të ekstremit të djathtë. Sipas tij, këto kontakte nuk janë raste të izoluara, por pjesë e rregullit në Republikën Sërpska. Ai përmendi si shembull bashkëpunimin e mëhershëm të zyrtarëve të lartë me Aleksandar Zaldostanov, udhëheqësin e grupit të motoçiklistëve “Ujqërit e Natës”, i cili gjendet në listën e zezë të Shteteve të Bashkuara.
Vujatoviqi argumenton se afrimi i politikës së Republikës Sërpska me Rusinë udhëhiqet nga oportunizmi politik dhe populizmi, pasi opinioni publik në këtë entitet është i ndjeshëm ndaj narrativit të presidentit rus, Vladimir Putin. Nga ana tjetër, për organizatat ruse si Rusov, Ballkani mbetet një terren i favorshëm për përhapjen e ideologjisë së tyre dhe për promovimin e përkatësisë ndaj botës shumëpolare. Deri në këto momente, Velibor Zekoviqi, Zhellko Gjuroviqi dhe përfaqësuesit e Rusovit nuk u janë përgjigjur kërkesave për koment lidhur me këto lidhje.