Pjesëtarë të Komandës Rajonale-Perëndim (RC-W) të misionit të KFOR-it kanë realizuar një stërvitje ushtarake me qitje të vërteta në poligonin ushtarak Voloire, i cili ndodhet në afërsi të kampit Villaggio Italia në Pejë.
Sipas njoftimit zyrtar të misionit, në këtë stërvitje morën pjesë ushtarë nga kombësi të ndryshme, kryesisht nga Italia dhe Bullgaria. Qëllimi i aktivitetit ishte shkëmbimi i ekspertizës dhe praktikave më të mira, si dhe forcimi i ndërveprueshmërisë midis njësive pjesëmarrëse për të ruajtur një nivel të lartë të gatishmërisë operacionale dhe ndërgjegjësimit për situatën.
KFOR-i theksoi se aktivitete të tilla janë dëshmi e përkushtimit për të garantuar një mjedis të qetë dhe të sigurt për të gjithë banorët e Kosovës. Misioni rikujtoi se e ushtron mandatin e tij në përputhje me Rezolutën 1244 të Këshillit të Sigurimit të OKB-së, duke synuar sigurimin e lirisë së lëvizjes në mënyrë të paanshme.
Në kuadër të operacioneve të sigurisë, KFOR-i punon në koordinim të ngushtë me Policinë e Kosovës dhe misionin e EULEX-it, të cilët veprojnë sipas roleve të tyre përkatëse si reagues të sigurisë.