Kirill Dmitriev, drejtor i Fondit Sovran të Pasurisë së Rusisë, deklaroi se Evropa dhe Britania kanë nevojë urgjente për energjinë ruse, pasi furnizimi global po ngushtohet.
Në një takim të Unionit Rus të Industrialistëve dhe Sipërmarrësve, ai parashikoi se "Rusia patjetër do të marrë shumë kërkesa nga Evropa dhe Britania dhe do të vendosë nëse do t’i plotësojë ato apo jo". "Evropa dhe Britania do të kërkojnë dhe lypin me ngulm burime energjie ruse", raporton agjencia shtetërore ruse RIA Novosti.
Dmitriev vlerësoi se çmimi i naftës mund të rritet në 150-200 dollarë për fuçi për shkak të trazirave në tregjet globale nga konflikti në Lindjen e Mesme. Ai paralajmëroi për një "krizë jashtëzakonisht serioze energjetike", për të cilën Evropa nuk është e përgatitur. Sipas burimeve, bllokada e Ngushticës së Hormuzit nga Irani ka ndërprerë flukset e gazit natyror të lëngshëm dhe ka shtyrë çmimet drejt 100 dollarëve për fuçi.
Dmitriev kritikoi Perëndimin për uljen e varësisë nga energjia ruse pas pushtimit të Ukrainës nga Moska në vitin 2022, duke thënë se kjo ka dëmtuar veten e tyre dhe se sanksionet perëndimore kanë dështuar. Ai e paraqet Russinë si të pazëvendësueshme për tregjet globale të energjisë.
Dmitriev ka luajtur rol në negociatat për luftën në Ukrainë dhe ka intensifikuar mesazhet ekonomike. Megjithatë, Brukseli mban qëndrim të vendosur. Komisioneri i BE-së për Energjinë, Dan Jørgensen, deklaroi se "nuk ka kthim pas te varësia nga energjia ruse" dhe se Bashkimi "nuk duhet të importojë asnjë pikë të vetme".