Drejtuesi i Agjencisë së Mbikëqyrjes Policore (AMP), Klevis Qose, ka zhvilluar një takim zyrtar me Karma M. Smith, e cila ka marrë detyrën si këshilltare e FBI-së për çështjet e krimit të organizuar pranë SPAK në Shqipëri. Takimi u fokusua te bashkëpunimi i vazhdueshëm ndërinstitucional dhe koordinimi i veprimeve të ardhshme në fushën e zbatimit të ligjit.
Gjatë këtij takimi, Klevis Qose vlerësoi kontributin e dhënë nga Jamar Williams gjatë periudhës së angazhimit të tij me AMP-në. Në takim mori pjesë edhe Richard Deasy, atashe për asistencën në çështjet e zbatimit të ligjit pranë Ambasadës së Shteteve të Bashkuara të Amerikës në Tiranë.
Sipas njoftimit zyrtar, bashkëpunimi me partnerët amerikanë mbetet një element thelbësor për AMP-në, me qëllim forcimin e kapaciteteve profesionale dhe rritjen e efektivitetit institucional në përballjen me krimin e organizuar. Ky takim rikonfirmoi partneritetin mes institucioneve shqiptare dhe atyre të SHBA-së.