Drejtori i Përgjithshëm i Agjencisë së Mbikëqyrjes Policore, Klevis Qose, priti në një takim zyrtar të dërguarin special të Presidentit të Shteteve të Bashkuara për Partneritetin Global, ambasadorin Paolo Zampolli. Gjatë bisedimeve, u rikonfirmuan marrëdhëniet e forta mes Shqipërisë dhe SHBA, duke vlerësuar kontributin e partnerëve amerikanë në fushat e inteligjencës dhe sigurisë.
Një pjesë thelbësore e takimit iu kushtua qëndrimit të Presidentit Donald Trump lidhur me rrezikshmërinë e fentanilit. U theksua se ky përbërës kimik është një kërcënim serioz, me pasoja vdekjeprurëse, ndërsa u përmend nënshkrimi i Urdhrit Ekzekutiv 14367 në dhjetor të vitit 2025, që e klasifikon fentanilin si armë të shkatërrimit në masë. Në këtë drejtim, u theksua domosdoshmëria e parandalimit, shkëmbimit të informacionit dhe bashkëpunimit më të ngushtë ndërmjet institucioneve shqiptare dhe atyre amerikane në luftën kundër rrjeteve të prodhimit dhe trafikimit të lëndëve narkotike.
Palët shqyrtuan gjithashtu perspektivat për forcimin e bashkëpunimit me rastin e ardhjes së ambasadorit të ri të Shteteve të Bashkuara në Shqipëri, Gjeneral Lejtnantit (në pension) Eric Wendt. Ky zhvillim u vlerësua si një mundësi për të thelluar koordinimin në fushën e sigurisë dhe goditjen e krimit të organizuar, duke ruajtur angazhimin e përbashkët për stabilitetin dhe sigurinë në vend.