Kontrolli i Lartë i Shtetit (KLSH) ka audituar 10 subjekte publike për zbatimin e rekomandimeve nga auditimet e vitit 2023. Rezultatet tregojnë pranim formal të lartë në nivel 98%, por zbatim real plotësisht vetëm 36% nga 465 masa të pranuara. 24% e masave mbeten të pazbatuara, me impakt financiar te të ardhurat e munguara, shpërblim dëmi dhe përgjegjësi disiplinore.
Albpetrol sh.a. evidentohet si një nga subjektet problematike për moszbatimin e rekomandimeve me pasoja financiare. Sipas raportit, shoqëria ka humbur 14.4 milionë dollarë të ardhura nga nafta bruto. Gjithashtu, KLSH vë në dukje mungesën e veprimeve ligjore për arkëtimin e rreth 1.2 miliardë lekëve nga shoqëria BPA LTD, shuma e krijuar nga mospagesat e energjisë elektrike dhe kamatëvonesat përkatëse. Këto detyrime lidhen me pagesat që Albpetrol i kryen për llogari të FSHU sh.a..
Gjatë periudhës 2021-2022, kompania BPA LTD nuk ka paguar konsumimin e energjisë elektrike, duke gjeneruar penalitete dhe kamatëvonesa në favor të Albpetrol sh.a. Patos. Në vitin 2022, Albpetrol ndërmori veprime administrative dhe ligjore, duke siguruar vendime gjykate si tituj ekzekutivë për faturat e papaguara dhe penalitetet.
Kamatëvonesat llogariten nga Albpetrol sipas Ligjit nr. 48/2014, por kjo llogaritje rezulton më e ulët se ajo e aplikuar nga OSHEE sh.a. për faturat e papaguara të Albpetrol. Kjo ka sjellë dëm ekonomik për shoqërinë. Raporti nxjerr në pah problematika në ndjekjen efektive të rekomandimeve dhe përgjegjësinë menaxheriale.