Kombëtarja U-21 e Shqipërisë do të zhvillojë ndeshje miqësore ndërkombëtare kundër Italisë U-21 më 8 qershor 2026, në stadiumin "Omero Tognon" të Pordenone. Takimi nis në orën 18:15.
Federata Shqiptare e Futbollit (FSHF) ka arritur marrëveshjen me Federatën Italiane të Futbollit për këtë ndeshje, e cila është e dyta në kuadër të grumbullimit të muajit qershor. FSHF po punon për të finalizuar edhe një tjetër ndeshje miqësore gjatë javës së parë të qershorit.
Këto përballje shërbejnë si përgatitje për Kampionatin Europian U-21 2027, ku Shqipëria është kualifikuar automatikisht si një nga vendet organizatore.
Skuadra e drejtuar nga trajneri Alban Bushi vjen me formë pozitive, duke regjistruar katër fitore në katër ndeshjet e fundit miqësore. Takimet e qershorit do të ndihmojnë stafin teknik në vlerësimin e lojtarëve dhe forcimin e grupit për sezonin e ardhshëm.