Pas qarkullimit të gjerë në rrjetet sociale dhe portalet online të materialeve të pretenduara intime, që përfshijnë figura të jetës publike në Shqipëri, Zyra e Komisionerit për të Drejtën e Informimit dhe Mbrojtjen e të Dhënave Personale ka ndërhyrë me një thirrje zyrtare për ndalimin e këtyre publikimeve. Komisioneri nënvizon se mbrojtja e jetës private dhe dinjitetit të individit mbetet parësore, pavarësisht statusit publik të personave të përfshirë.
Sipas reagimit zyrtar, kurioziteti i publikut për jetën intime të individëve nuk përbën një interes publik që mund të justifikojë shkeljen e privatësisë. Institucioni ka sqaruar se liria e shprehjes dhe e informimit duhet të ushtrohet në përputhje me kërkesat e Ligjit nr. 124/2024, duke respektuar parimet e domosdoshmërisë dhe proporcionalitetit.
Zyra e Komisionerit bën të qartë se:
• Fakti që një material është publikuar më parë në internet nuk e legjitimon rishpërndarjen e tij.
• Çdo rishpërndarje rrit dëmin ndaj personave të prekur dhe familjeve të tyre.
• Përpunimi i paligjshëm i të dhënave personale është subjekt i sanksioneve administrative dhe penale.
Zyra e Komisionerit u ka bërë thirrje mediave dhe përdoruesve të internetit që të ndërpresin menjëherë shpërndarjen e përmbajtjeve të tilla dhe të sigurojnë heqjen e materialeve të publikuara në kundërshtim me legjislacionin në fuqi.